Ижтимоий тармоқларда Бухоро шаҳридаги 42-сонли умумтаълим мактаби ўқувчилари дарс вақтида мажбурий меҳнатга жалб этилаётгани ҳақида хабарлар тарқалди. Бухоро вилояти Таълим ва илм-фан бошқармаси ҳолат юзасидан расмий муносабат билдириб, ўқувчилар ҳеч қандай меҳнат ишларига жалб қилинмаганини маълум қилди.
Бошқарма маълумотига кўра, 1958-йилда қурилган мактаб 800 ўринга мўлжалланган бўлса-да, ҳозирда унда 1 329 нафар ўқувчи таҳсил олмоқда. Қўшимча шароит яратиш мақсадида мактаб ҳудудида 540 ўринли янги бино қуриш режалаштирилган. Айни пайтда унинг смета-лойиҳа ҳужжатлари тайёрланмоқда.
Шунингдек, мавжуд мактаб биносининг техник ҳолати ёмонлашгани аниқланган. Хусусан, мусиқа зали жойлашган учинчи қават томининг бир қисми қулаб тушган, бошқа хоналарда ҳам том қисмининг чўкиши ва конструктив деформатсиялар кузатилган. Бухоро вилояти Қурилиш ва уй-жой коммунал хўжалиги соҳасида ҳудудий назорат қилиш инспексиясининг 9-ноябрдаги хатида мактаб бинолари фойдаланишга яроқсиз деб топилиб, улардан фойдаланишни тақиқлаш тавсия этилган.
Шу сабабли ўқувчилар ва педагоглар хавфсизлигини таъминлаш мақсадида таълим жараёнини 44-сонли мактаб ҳамда Бухоро юридик коллежининг бўш турган биноларида давом эттириш режалаштирилган.
Бошқарма маълумотига кўра, 15-ноябрь куни ўқувчилар ва педагогларни янги биноларга кўчириш, шунингдек, жиҳозлар ҳамда ўқув воситаларини ташиш ишлари ташкил этилган. Жараёнда мактаб техник ходимлари ва ихтиёрий равишда ёрдам берган ота-оналар қатнашган.
Расмий муносабатда ўқувчилар ушбу ишларда иштирок этмагани ва дарс вақтида таъмирлаш ишларига жалб қилинмагани таъкидланган.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!