Rossiyaning eng yirik neft kompaniyalaridan biri “Lukoyl” xorijiy aktivlarini sotishini e’lon qildi. Bunga kompaniya va uning sho‘ba korxonalariga nisbatan “ba’zi davlatlar tomonidan cheklov choralari joriy etilishi” sabab bo‘ldi. “Potensial xaridorlarning takliflarini ko‘rib chiqish boshlandi”, — deyiladi “Lukoyl”ning ingliz tilidagi saytida.

AQSh Moliya vazirligining Xorijiy aktivlarni nazorat qilish boshqarmasi 22-oktyabr kuni Rossiyaning “Lukoyl” va “Rosneft” kompaniyalariga qarshi sanksiyalar kiritdi. Cheklovlar urushni yakunlash uchun “Rossiyaning tinchlik jarayoniga jiddiy qiziqishi yo‘qligi” sabab joriy etildi.

“Prezident Putin bu bema’ni urushni to‘xtatishdan bosh tortganini hisobga olib, Moliya vazirligi Kreml harbiy mashinasini moliyalashtirayotgan Rossiyaning ikkita eng yirik neft kompaniyasiga qarshi sanksiyalar joriy etmoqda”, — deyiladi AQSh moliya vaziri Skott Bessent bayonotida. Bundan tashqari, AQSh Moliya vazirligi “prezident Trampning Rossiya urushini to‘xtatish bo‘yicha sa’y-harakatlarini qo‘llab-quvvatlash” uchun “qo‘shimcha choralar ko‘rishga” ham tayyor. Idora, shuningdek, “ittifoqchilarni” ularga qo‘shilishga va “ushbu sanksiyalarga amal qilishga” chaqirdi.

Rossiyaning ikki yirik neft kompaniyasi — “Rosneft” va “Lukoyl” aksiyalari AQSh sanksiyalaridan keyin quladi. Ikki kun ichida ularning jami kapitalizatsiyasi 424 milliard rublga (5,2 milliard dollar) tushib ketgan.

Sanksiyalar “Lukoyl” va “Rosneft” kompaniyalarining Rossiya hududidagi sho‘ba korxonalariga ham tatbiq etilgan. Umuman olganda, ro‘yxatda 34 ta sho‘ba korxona bor: ularning 28 tasi “Rosneft”ga, oltitasi esa “Lukoyl”ga tegishli.

• AQSh
• Rossiya
• Sanksiya
• neft