Bugun Janubiy Koreyaning Pusan shahridagi Kimxe harbiy aviabazasida Xitoy Xalq Respublikasi Raisi Si Szinpin va AQSh Prezidenti Donald Trampning uchrashuvi bo‘lib o‘tdi. Bu haqda Xitoy markaziy televideniyesi xabar berdi.

Tramp Szinpinni kutib olib, Pekin va Vashington ko‘plab masalalarda kelishuvga erishgani hamda bu yo‘nalishda sammit davomida ham ish olib borilishini ta’kidlagan. Qo‘shma Shtatlar rahbari, shuningdek, Xitoy bilan savdo bitimi aynan shu uchrashuv yakunida imzolanishi mumkinligini istisno qilmagan. U har doim Si Szinpin bilan yaxshi munosabatlarda bo‘lganini qayd etgan. 

“Rais Si – buyuk davlatning buyuk yetakchisi. Ishonamanki, biz uzoq yillar davomida ajoyib munosabatlarga ega bo‘lamiz”, – deya qo‘shimcha qilgan Donald Tramp. 

Si Szinpin ham Xitoy va AQSh bir-biriga yordam berib, muvaffaqiyat va farovonlikka erishishi mumkinligini aytgan.

Shuningdek, Xitoy Raisi mamlakatining rivojlanishi va tiklanishi Trampning “Amerikani yana buyuk davlatga aylantirish” maqsadiga zid emasligini ta’kidlagan. 

“Men Prezident Tramp bilan hamkorlikni davom ettirishga tayyorman, bu ikki davlat o‘rtasidagi munosabatlar uchun mustahkam poydevor va mamlakatlar rivoji uchun qulay sharoitlar yaratadi”, – degan Si Szinpin. 

Ma’lumot uchun, ikki davlat yetakchisi Osiyo-Tinch okeani iqtisodiy hamkorligi (APEC) sammitida ishtirok etmoqda. APEC 1989-yilda tashkil etilgan bo‘lib, 21 ta mamlakat iqtisodiyotini birlashtiradi. U xalqaro tashkilot maqomiga ega bo‘lmasa-da, mintaqada savdo hamkorligini rivojlantirish uchun muhim maydon hisoblanadi. 2025-yilda sammitga raislik qilish huquqi Janubiy Koreyaga o‘tgan.

• Janubiy Koreya
• Muzokara
• Si Szinpin
• Tramp
• uchrashuv