Janubiy Koreyada meros solig‘i stavkasi 50 foizgacha yetadi va bu dunyodagi eng yuqori ko‘rsatkichlardan biri hisoblanadi.

2020-yil oktabrida vafot etgan sobiq rais Lee Kun-heedan qolgan ulkan meros uchun uning oilasi jami 12 trillion von (taxminan 8 mlrd dollar) miqdorida soliq to‘ladi. Bu haqda BBC xabar berdi.

Ma’lumotlarga ko‘ra, marhum tadbirkor 26 trillion von (qariyb 18 mlrd dollar) miqdorida boylik qoldirgan. Aktivlar tarkibiga aksiyalar, ko‘chmas mulk va qimmatbaho san’at asarlari kiradi.

Soliq to‘lovlari besh yil davomida olti bosqichda amalga oshirildi. To‘lov jarayonida kompaniya raisi Lee Jae-yong, uning onasi Hong Ra-hee hamda singillari Lee Boo-jin va Lee Seo-hyun ishtirok etdi. Kompaniya 3-may kuni so‘nggi to‘lov yakunlanganini tasdiqladi.

Jarayon investorlar tomonidan diqqat bilan kuzatildi. Sababi, bunday yirik soliq majburiyati kompaniya ustidan oila nazoratiga ta’sir qilishi mumkin edi.