Bosh prokuratura huzuridagi Departamentning Mirzacho‘l tumani bo‘limi va boshqa huquqni muhofaza qiluvchi organlar xodimlari hamkorligida o‘tkazilgan tezkor tadbirda fuqaro A.B. 10 000 AQSh dollari evaziga fuqaro Z.I.ni go‘yoki yuqori lavozimlarda ishlovchi tanishlari orqali Isroil davlatiga ishga yuborishini aytib, kelishilgan mablag‘dan 4 000 AQSh dollarini olgan vaqtida ashyoviy dalillar bilan ushlandi.

Shuningdek, Departamentning Buxoro shahar bo‘limi tomonidan o‘tkazilgan tezkor tadbirda fuqaro D.A. fuqarolar U.R. va A.J.ning ishonchiga kirib, ularni go‘yoki xorijda yashovchi tanishlari orqali ishga joylashtirib qo‘yishni va’da qilib, Bolgariya va Litva davlatlariga yuborish uchun viza olib berish evaziga 3 400 AQSh dollarini olgan vaqtida ushlandi.

Yana bir holatda, Departamentning Samarqand viloyati boshqarmasi tomonidan o‘tkazilgan tezkor tadbirda “S.T.” MChJ rahbari O.A. fuqaro M.M.ning ishonchiga kirib, uni 17 000 AQSh dollari evaziga Isroil davlatiga ishga yuborish uchun “ishchi viza” rasmiylashtirib berishni va’da qilgan holda, oldindan 2 000 AQSh dollarini olgan vaqtida ushlandi.

Mazkur holatlar yuzasidan Jinoyat kodeksining 168-moddasi (firibgarlik) va 211-moddasi (pora berish) bilan jinoyat ishlari qo‘zg‘atilib, tergov harakatlari olib borilmoqda.