2026-yil 1-iyuldan boshlab O‘zbekistonda nodavlat tibbiyot muassasalariga davlat budjeti hisobidan bemorlarga xizmat ko‘rsatishga ruxsat beriladi. Bu prezidentning yangi farmonida belgilandi.

Unga ko‘ra, xususiy klinikalar davlat bilan shartnoma asosida ishlaydi va davolash xarajatlari yagona bazaviy tariflar bo‘yicha qoplanadi. Bu tizim davlat va xususiy sektor o‘rtasida teng sharoit yaratishga qaratilgan.

Akkreditatsiyadan o‘tgan tibbiyot muassasalari uchun davlat bilan shartnoma tuzishda qo‘shimcha ekspert xulosasi talabi bekor qilinadi. Shuningdek, bemorlarni ambulator davolash va jarrohlik amaliyotlariga yo‘naltirish tartibi joriy etiladi.

Davlat mablag‘larini klinikalar kesimida taqsimlash amaliyoti bekor qilinib, endi mablag‘lar kasallik yo‘nalishlari bo‘yicha belgilanadi.

 Litsenziya tizimi ham o‘zgaradi

Endilikda qoidabuzarlik aniqlansa, klinikaning butun faoliyati emas, balki faqat tegishli yo‘nalishi bo‘yicha litsenziyasi vaqtincha to‘xtatiladi.

200 mln dollarlik qo‘llab-quvvatlash

Farmonga ko‘ra, 200 million dollar miqdorida imtiyozli kredit liniyasi ochiladi. Ushbu mablag‘lar hududlarda zamonaviy klinikalar tashkil etishga yo‘naltiriladi.

Kreditlar 10 yil muddatga, 3 yillik imtiyozli davr bilan ajratiladi. Shuningdek, foizlarning bir qismi davlat tomonidan kompensatsiya qilinadi.

Yangi tashkil etilgan klinikalar 3 yil ichida milliy yoki xalqaro akkreditatsiyadan o‘tishi shart etib belgilandi.