Andijon viloyatida o‘tkazilgan tezkor tadbirlar davomida zarar miqdorini kamaytirish va yirik kredit ajratishda yordam berishni va’da qilgan ikki mansabdor shaxs ushlandi.

Birinchi holatda, Qurilish va uy-joy kommunal xo‘jaligi sohasida hududiy nazorat inspeksiyasining sho‘ba boshlig‘i ichimlik suvidan noqonuniy foydalanish oqibatida davlatga yetkazilgan qariyb 680 million so‘mlik zarar miqdorini kamaytirib berish va ma’muriy choralar ko‘rilishida yordam berish evaziga 30 million so‘m talab qilgan. U pulni olayotgan vaqtda ashyoviy dalillar bilan qo‘lga olindi.

Ikkinchi holatda esa tijorat banklaridan birining Asaka tumani filiali bosh menejeri fuqaroga 3 milliard 650 million so‘mlik kredit ajratilishiga ko‘maklashish evaziga 8 ming AQSH dollari talab qilgan. U aprel–may oylarida jami 7 800 AQSH dollari olgan, keyinchalik uning bir qismini qaytarayotgan paytda tezkor tadbir davomida ushlandi.

Har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.