Argentinalik futbol yulduzi Lionel Messining boyligi 1 milliard dollarga yetdi. Bu haqda Bloomberg xabar berdi.

Ma’lumotlarga ko‘ra, Messi 2007 yildan buyon maosh va bonuslarning o‘zidan 700 million dollardan ortiq daromad topgan. Uning milliarder maqomiga erishishida reklama shartnomalari, teleloyihalar va investitsiyalar muhim rol o‘ynagan.

Shu tariqa, Messi Cristiano Ronaldodan keyin milliarderga aylangan ikkinchi futbolchi bo‘ldi.

Hozirda Messi Inter Miami CF safida to‘p surmoqda. Futbolchining klubdagi bazaviy maoshi yiliga 25 million dollarni, umumiy kafolatlangan daromadi esa 28,3 million dollarni tashkil etadi.

Shuningdek, uning shartnomasida klub aksiyalariga egalik qilish hamda Apple va Adidas bilan hamkorlikdan tushadigan foydadan ulush olish ham belgilangan. Messining yillik daromadi taxminan 130 million dollarga baholanmoqda.

Ayni paytda Cristiano Ronaldo dunyoning eng ko‘p daromad topayotgan sportchisi bo‘lib qolmoqda. Forbes ma’lumotiga ko‘ra, u bir yil ichida 300 million dollar ishlab topgan.