Hindistonlik taniqli aktrisa Priyanka Chopra bundan 20 yil avval jarrohlik amaliyotiga murojaat qilgani, buning oqibatida ruhiy tushkunlikka duchor bo‘lgani haqida gapirdi.

Ijodkorning aytishicha, amaliyotga burun sohasidagi shishlarni olib tashlash ehtiyoji sabab bo‘lgan. Aktrisani jarroh qabuliga borishga o‘zi ham shifokor sifatida faoliyat yuritgan otasi Ashok Chopra undagan. “Men dahshatga tushib qolganman, otam bo‘lsa “Men ham xonada sen bilan birga bo‘laman” degan. U "operatsiya" vaqtida qo‘limdan ushlab turgan va o‘zimga bo‘lgan ishonchni qaytarishga yordam bergan”, – dedi Priyanka.

Ma’lum bo‘lishicha, jarroh amaliyot vaqtida xatoga yo‘l qo‘ygan, natijada aktrisaning burun shakli butunlay o‘zgarib qolgan. “Yuzim boshqacha ko‘rinishga kirgan, men o‘zimga o‘xshamay qolganman. Chuqur depressiyaga tushganman”, – deydi aktrisa.

Bu vaqtda go‘zallik tanlovlarida faol ishtirok etayotgan Priyanka tashqi ko‘rinishining o‘zgarib qolgani tufayli ikkita loyihani qo‘ldan boy bergan.

Jarroh yo‘l qo‘ygan xato aktrisaning kinodagi faoliyatiga nuqta qo‘yishi ham mumkin edi. Ana shu vaqtda taniqli rejissyor Anil Sharma Priyankani qo‘llab-quvvatlagan. “Men filmdagi bosh rolni ijro etishim kerak bo‘lgan, ammo meni ikkinchi darajali rolga o‘tkazib qo‘yishgan. Film rejissyori juda yaxshi inson edi. Hamma menga qarshi bo‘lib turganda “Bu kichikroq rol, ammo unga bor mehringni ber” deb aytgan. Men ham uning aytganini qilganman”, – deydi aktrisa.

• Kino
• Madaniyat
• Shou-biznes
• mashhurlar