Milliarder Alisher Usmonovning USM holdingi “Kapitalbank” aksiyalarini sotdi. Bu haqda bank matbuot xizmati xabar berdi.

Qayd etilishicha, “Kapitalbank” aksiyalarining 61,54 foiziga birgalikda egalik qiluvchi “Telekominvest” MCHJ (RF) va “FINANCE TCI” MCHJ (O‘zbekiston) ustav kapitalidagi 100 foiz ulushini sotish bo‘yicha bitim tuzdi. 

Unga ko‘ra, bitim “Kapitalbank” biznesini birgalikda rivojlantirishdan manfaatdor bo‘lgan xususiy investorlar guruhi tashabbusi bilan tuzilgan. Biroq, bitimning tijorat shartlari oshkor etilmagan.

“Kapitalbank”ning yirik miqdordagi aksiyalariga egalik qiluvchi kompaniyalar Alisher Usmonovga qarashli hisoblanadi. Rossiyalik milliarder 2021-yilning noyabr oyidan beri “Kapitalbank”dagi ulushini oshirib kelayotgandi.

Ma’lumot o‘rnida, 2021-yil 29-oktyabr kuni Oybek Botirovich Tursunov “Kapitalbank” aksiyadorlik tijorat banki ustav kapitalidagi 34,10 foiz aksiyani sotib olgandi. Shu bilan bankdagi u egalik qiladigan jami aksiyalar 50 foizga yetgan. Fond birjasi saytida xarid narxi bo‘yicha ma’lumotlar keltirilmagan.

Bitimdan so‘ng bankda Oybek Tursunov egalik qiladigan aksiyalar soni 164 million 927 890 taga yetgandi.

• Aksiya
• Alisher Usmonov
• Kapitalbank