Kuni kecha, 7-mart kuni “Amirsoy” togʻ-changʻi kurortida Oʻzbekiston Milliy paralimpiya qoʻmitasi tomonidan ilk bor jismoniy imkoniyati cheklangan, zaif koʻruvchi va koʻzi ojiz insonlar oʻrtasida para togʻ changʻisi sport turi boʻyicha Oʻzbekiston chempionati tashkil etildi.

Musobaqaning ochilish marosimida Oʻzbekiston Respublikasi Sportni rivojlantirish vaziri oʻrinbosari Shaxrillo Mahmudov, Oʻzbekiston Milliy paralimpiya qoʻmitasi raisi Muxtorxon Tashxodjayev, Oʻzbekiston davlat Jismoniy tarbiya va sport universiteti rektori Mahmud Boltaboyev, “Amirsoy” togʻ changʻi kurorti bosh direktori Saidvali Saidxoʻjayev ishtirok etishdi.

Qiziqarli kechgan musobaqa yakunlariga koʻra, para togʻ changʻisi boʻyicha ayollar oʻrtasida Asel Turdimuratova gʻoliblikni qoʻlga kiritdi. Ikkinchi oʻrin esa Yulduz Mahmudovaga nasib etdi.

Erkaklar oʻrtasidagi bahslarda Firdavs Xudoyatovga teng keladigani topilmadi. Kumush medalga Kamron Abduvohidov sazovor boʻldi.

Bundan tashqari paralimpiya oilasiga qoʻshilish istagini bildirgan va sportga qiziqishi boʻlgan hamyurtlarimiz ishtirokida para snoubord va aravachada kyorling sport turlari boʻyicha saralash (seleksiya) tadbirlari ham oʻtkazildi.

• O‘zbekiston
• Sport