Germaniyaning Vayzenxaus kurortida shaxmat bo‘yicha nufuzli Freestyle Chess Jahon chempionatining so‘nggi kun bellashuvlari o‘tkazildi. Musobaqada O‘zbekiston sharafini himoya qilgan Nodirbek Abdusattorov 3-o‘rinni egalladi, Javohir Sindorov esa 7-o‘rin uchun bahsda Levon Aronyanga mag‘lub bo‘ldi.

Yarim finalda Magnus Karlsenga imkoniyatni boy bergan Nodirbek Abdusattorov 3-o‘rin uchun germaniyalik Vinsent Keymerga qarshi bahs olib bordi va 2,5:1,5 hisobida g‘alaba qozonib, turnirni 3-o‘rinda yakunladi va 40 000 AQSh dollari miqdoridagi mukofot pulini qo‘lga kiritdi.

Chempionlik uchun hal qiluvchi bahsda Magnus Karlsen va Fabiano Karuana o‘zaro to‘qnash keldi va unda dunyoning birinchi raqamli shaxmatchisi 2,5:0,5 hisobida g‘alabaga erishdi. Karlsen shu tariqa faoliyatida 21-marta turli yo‘nalishlardagi Jahon chempionligini qo‘lga kiritdi.

Yana bir o‘zbekistonlik grossmeyster Javohir Sindorov 7-o‘rin uchun bahsda amerikalik Levon Aronyanga qarshi bahsda mag‘lubiyatga uchradi. Shu tariqa Sindorov esa turnirni 8-o‘rinda yakunlab, 10 000 AQSh dollari miqdoridagi pul mukofotiga ega bo‘ldi.

Umumiy mukofot jamg‘armasi 300 ming AQSh dollari bo‘lgan ushbu musobaqa FIDE Freestyle (Fisher shaxmati) yo‘nalishi bo‘yicha ilk rasmiy Jahon chempionatini hisoblanib, unda jami 8 nafar shaxmatchi ishtirok etdi.

Musobaqada chempion norvegiyalik Magnus Karlsen 100 ming AQSh dollari miqdoridagi mukofotga ega bo‘ldi.

• Jahon chempionati
• Nodirbek Abdusattorov
• Shaxmat