Ijtimoiy tarmoqlarda “Andijonda 28 yoshli ayol va onasi qarindoshi tarafidan ayovsiz kaltaklandi” sarlavhasi bilan tarqalgan videotasvirlar yuzasidan viloyat IIB rasmiy bayonot berdi.

Aniqlanishicha, videotasvirda aks etgan holat 2025-yilning 5-yanvar kuni Andijon shahridagi “Ishchilar” mahallasida sodir bo‘lgan. Ushbu mahallada istiqomat qiluvchi Q.M. (ayol) qarindoshi 1991-yilda tug‘ilgan R.A. (erkak) bilan o‘zaro gap tortishib, R.A. fuqaro Q.M.ni turli so‘zlar bilan haqoratlagan va uning yuz qismiga oyog‘i bilan tepib yuborgan.

Shuningdek, Q.M.ga tegishli bo‘lgan Spark rusumli avtomashinani turli qattiq jismlar bilan urib, uning oldi, orqa va yon oynalariga va oldi o‘ng tomondagi chiroqlariga texnik shikast yetkazgan.

Bundan tashqari, R.A. janjal vaqtida Q.M.ning onasi T.M.ga ham tan-jarohati yetkazganligi holati aniqlangan.  

Fuqaro R.A.ning ruhiy kasal ekanligi aniqlanib, Andijon viloyati ruhiy kasalliklar shifoxonasiga davolatish maqsadida joylashtirilgan.

Fuqarolar Q.M. hamda T.M.larning olgan tan-jarohatlari bo‘yicha sud-tibbiy ekspertizasi tayinlanib, holat yuzasidan Andijon shahri bo‘yicha ichki ishlar organlari faoliyatini muvofiqlashtirish boshqarmasi tomonidan tergovga qadar tekshiruv harakatlari olib borilmoqda.

• Andijon
• Kaltaklash