Qirg‘izistondan Andijon viloyati orqali transmilliy jinoiy uyushma a’zolari tomonidan katta miqdordagi giyohvandlik vositalarining kontrabandasiga chek qo‘yildi. Bu haqda IIV matbuot xizmati xabar berdi.

Vazirlik tezkor qidiruv departamenti va uning hududiy bo‘linmalari, Davlat xavfsizlik xizmati va Davlat bojxona qo‘mitasi xodimlari hamkorligida o‘tkazilgan tezkor tadbir natijasida Andijon viloyati Bo‘ston tumani hududida joylashgan dala maydoniga ko‘mib ketilgan 9 kg 447 g gashish giyohvandlik vositasini olgan vaqtida 1990, 1996, 1980, 1981-yillarda tug‘ilgan uyushgan guruh a’zolari tezkor tadbir ishtirokchilari tomonidan qo‘lga olingan.

Xabarga ko‘ra, transmilliy jinoiy uyushmaning O‘zbekistondagi tashkilotchilardan bo‘lgan shaxs Qirg‘izistonda yashovchi fuqaroning ko‘rsatmasiga asosan yuqoridagi geolokatsiyadan giyohvandlik vositalarini olib, boshqa viloyat hududlariga tarqatishi lozim bo‘lgan. O‘tkazilgan tezkor tadbir natijasida O‘zbekistonda 94 470 ta bir martalik dozaga teng bo‘lgan 9 kilogramm 447 gramm gashish giyohvandlik vositasi tarqalishining oldi olingan.

Holat yuzasidan ushbu jinoiy guruhga nisbatan Jinoyat kodeksining 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) beshinchi qismiga asosan 10 yildan 20 yilgacha ozodlikdan mahrum qilish jazosi qo‘llanilishi mumkin.

• Andijon
• Giyohvandlik
• IIV
• Jinoyat