Taniqli tahlilchi Ming-Chi Kuoning so‘zlariga ko‘ra, Apple hozirgi “Apple TV” modellariga nisbatan ancha ixcham va byudjetga mos keladigan yangi televizor qutisini chiqarishni rejalashtirmoqda.

Narxlari va o‘lchamlari bo‘yicha u “Google Chromecast”, “Amazon Fire TV” va “Roku” pristavkalari bilan raqobatlashadi. Apple’ning televizor ishlab chiqarishi haqida birinchi marta 2018 yilda xabar berilgan edi.

U foydalanuvchilarga jozibador narxda “Apple TV+”dan foydalanish imkoniyatini taqdim etishi kerak edi, ammo 2021 yilda arzon va ehtimol pastroq sifatli qurilma chiqarilishi bilan kompaniya obro‘siga putur yetkazmaslik uchun undan voz kechilgani ma’lum bo‘ldi.

Endi bu g‘oya yana ishga tushdi – va Kuoning so‘zlariga ko‘ra, “Apple TV”ning yangi versiyasi 2022 yilning ikkinchi yarmida chiqishi kutilmoqda. Uning narxi aniqlanmagan, biroq u 149 dollar narxda sotuvda qolayotgan Apple TV HD’dan past bo‘lishi aniq.

Agar kompaniya mavjud nomlash tamoyillariga amal qilsa, qurilma Apple TV mini yoki Apple TV SE sifatida sotuvga chiqishi mumkin.

• Apple
• Televizor