AQSh Prezidenti Donald Tramp mamlakatda “sun’iy intellekt” (SI) atamasidan voz kechib, uni “super intellekt” deb atashni ma’lum qildi. U boshqa davlatlarni ham mazkur ta’rifga ergashishga chaqirdi. Bu haqda u 22-sentyabr kuni BMT Bosh Assambleyasidagi nutqida so‘z ochdi.

“Shu daqiqadan boshlab AQSHning barcha hujjatlarida va umid qilamanki, butun dunyoda “sun’iy intellekt” o‘rniga ancha aniqroq bo‘lgan “super intellekt” atamasi qo‘llaniladi”, — dedi Donald Tramp.

AQSH yetakchining tushuntirishicha, yangi atama quloqqa ancha yaxshiroq eshitiladi. U “sun’iy” so‘zi texnologiya haqida go‘yoki “soxta va aslidagidek emas” degan noto‘g‘ri taassurot uyg‘otishini ta’kidladi.

Asossiz qo‘rquvlar va nazorat

Tramp o‘z chiqishida sun’iy intellekt keltirib chiqaradigan tahdidlar haqidagi ogohlantirishlarni keskin rad etib, ularni uydirma deb atadi. Uning fikricha, avvallari iqlim o‘zgarishi sababli insoniyatning muqarrar halokati haqida bong urganlar bugun jamoatchilikni “robotlar insoniyatga hujum qiladi” deb qo‘rqitmoqda.

Shu bilan birga, AQSH texnologiyalar taraqqiyotini diqqat bilan kuzatib borishini ta’kidlagan Prezident zaruriyat tug‘ilsa, Adliya vazirligi va huquqni muhofaza qilish organlari vaziyatni nazorat ostiga olishga tayyorligini eslatib o‘tdi.

“Men sanoat inqilobidan ham ulkanroq miqyosdagi bu hodisaning rivojlanishini jilovlamoqchi emasman”, — dedi Amerika yetakchisi sohaga yashil chiroq yoqishini bildirib.

Texnologik poyga va xavotirlar

So‘nggi haftalarda AQSHda SI sohasidagi ishlanmalarni biroz sekinlashtirib, texnologiyaning insoniyat uchun xavfsizligiga to‘la amin bo‘lish g‘oyasi qizg‘in muhokama qilinmoqda. Xususan, mamlakatdagi yirik texnologik kompaniya rahbarlari shunday ehtiyotkorona choralarni qo‘llab-quvvatlashmoqda.

Ma’lumot uchun, avvalroq Amerikaning Anthropic kompaniyasining SI xavfsizligi bo‘yicha mutaxassisi Evan Xyubinger sun’iy intellekt yaqin o‘n yil ichida sivilizatsiyamizni yo‘q qilib yuborish ehtimoli 10 foizni tashkil etishini taxmin qilgan edi.