Nepalda Goma ismli urg‘ochi yo‘lbars bir vaqtning o‘zida beshta bolaga — o‘zining ikkita va boshqa urg‘ochi yo‘lbarsning uchta bolasiga qarab turgani bilan e’tibor qozondi. Bu haqda BBC’ning “Tiger Island” hujjatli loyihasi mualliflari ma’lum qildi.

G‘ayrioddiy holat mamlakat g‘arbidagi Bardia milliy bog‘i yaqinida joylashgan jamoat o‘rmonida fototuzoqlar yordamida qayd etilgan. Goma beshta yo‘lbars bolasi bilan qolgan paytda, Jugini ismli boshqa urg‘ochi yo‘lbars oziqlanayotgan bo‘lgan.

BBC jamoasi kuzatuvni yovvoyi tabiatda urg‘ochi yo‘lbarsning boshqa yo‘lbars bolalariga g‘amxo‘rlik qilishi mumkinligining o‘ziga xos namunasi sifatida baholagan. Hayvonlarni bir-biridan farqlashda ularning tanasidagi chiziqlar naqshidan foydalanilgan.

Tadqiqotchilar Goma va Jugini o‘rtasida qarindoshlik aloqasi bo‘lishi mumkinligini ham taxmin qilmoqda. Jumladan, Goma Juginining onasi bo‘lishi ehtimoli bor. Biroq bu taxmin hozircha genetik tekshiruvlar orqali tasdiqlanmagan.

Yo‘lbarslar, odatda, ov qilish va hududdan foydalanishda yakka hayot kechiradi. Mutaxassislarning ta’kidlashicha, bu kuzatuv urg‘ochi yo‘lbarslar ayrim sharoitlarda boshqa yo‘lbarslarning bolalariga ham qarashi mumkinligini ko‘rsatadi. Bunday xatti-harakat qanchalik kam uchrashi yoki bu bir martalik holat ekanini aniqlash uchun qo‘shimcha kuzatuvlar zarur.