AQShning Okean va atmosfera tadqiqotlari milliy boshqarmasi (NOAA) olimlari o‘zlarining yangi hisobotida yaqin 30 yil ichida AQSh qirg‘oqlarida suv sathi 25-30 sm ga ko‘tarilishini ma’lum qildi. Bu haqda “Forbes” xabar berdi. 

Ta’kidlanishicha, buning asosiy sababi iqlim o‘zgarishi natijasida eriyotgan muzliklardan okeanga tushadigan suv hajmining ko‘payishidir.

Qayd etilishicha, NOAA olimlari yaqin 30 yil ichida AQSh qirg‘oqlarida dengiz sathi so‘nggi 100 yildagidek 25-30 sm.ga ko‘tarilishini bashorat qilmoqda. 

Shuningdek, atmosferaga zarar yetkazayotgan karbonat angidrid chiqindilari kamaytirilgan taqdirda ham, 2050-yilga kelib dengiz sathi ko‘tarilishining oldini olish mumkin emasligi aytib o‘tilgan. Tadqiqotchilar bunday o‘zgarishlar muqarrar ravishda tez-tez halokatli toshqinlarga olib kelishini tahmin qilmoqda. Unga ko‘ra yirik toshqinlar besh marta, o‘rtacha suv toshqinlari esa o‘n barobar ko‘proq sodir bo‘ladi.

Mutaxassislarning fikricha, 2050-yildan so‘ng dengiz sathining tez suratda ko‘tarilishiga yo‘l qo‘ymaslik uchun hozirdanoq atmosferaga karbonat angidrid chiqindilarini kamaytirish bo‘yicha jiddiy choralar ko‘rish kerak. Aks holda, 2100-yilga kelib, Amerika qit’asi atrofidagi suv sathi 2 m.ga qadar (!) ko‘tarilishi mumkin. 

Bunga qadar, global miqyosda dengiz sathi 1920-yildan 2020-yilgacha taxminan 153 sm.ga ko‘tarilgan.

Avvalroq, BMT tuzilmalaridan biri – Butunjahon meteorologiya tashkiloti (WMO) bosh kotibi Petteri Taalas Yer sayyorasidagi haroratning ko‘tarilishi so‘nggi 200 ming yildagi eng kuchlisi ekanini ma’lum qilgan edi.
 

• AQSh
• BMT
• Suv
• suv_toshqini