Ma’lumotlarga ko‘ra, Toshkent viloyatining Zangiota tumanida joylashgan “Bek Baraka” ixtisoslashgan savdo kompleksi MChJ direktori o‘rinbosari firibgarlik yo‘li bilan bozor balansidagi yangi tipda qurilgan savdo do‘konini, o‘zining yuqori lavozimlarda ishlovchi tanishlari yordamida tadbirkorlik bilan shug‘ullanmoqchi bo‘lgan fuqaroga olib berish evaziga 20 ming AQSh dollari olgan vaqtida Davlat xavfsizlik xizmatining Toshkent shahar bo‘yicha boshqarmasi xodimlari tomonidan qo‘lga olingan.
Davlat xavfsizlik xizmati (DXX)ning Xorazm viloyati bo‘yicha boshqarmasi xodimlari tomonidan tezkor tadbir o‘tkazilgan. Unda Milliy gvardiya Xorazm viloyati Qo‘riqlash boshqarmasi Shovot tumani qo‘riqlash bo‘limi texnik qo‘riqlash markazi boshlig‘i firibgarlik yo‘li bilan 1400 dollar hamda 1,2 million so‘m pullarni olgan vaqtida ushlangan.
Aniqlanishicha, u mahalliy fuqaroni Milliy Gvardiya tizimiga ishga joylashtirib qo‘yishni va’da qilgan.
Shuningdek, DXXning Toshkent shahar bo‘yicha boshqarmasi xodimlari tomonidan Bosh prokuratura huzuridagi Iqtisodiy jinoyatlarga qarshi kurashish departamentining shahar boshqarmasi bilan hamkorlikda o‘tkazilgan tezkor tadbirda advokatlik byurosi advokati firibgarlik yo‘li bilan fuqarodan 5 ming dollar olgan vaqtida ushlangan.
Ma’lum bo‘lishicha, advokat o‘zining Oliy sudda ishlovchi tanishlari orqali fuqarolik ishlari bo‘yicha Mirzo Ulug‘bek tumanlararo sudining 2023-yil oktyabr oyidagi hal qiluv qarorini sudning appellyatsiya instansiyasi jarayonida fuqaro (sudlanuvchi) foydasiga o‘zgarishsiz qoldirish masalasini hal qilib berishni va’da qilgan.
Buxoro viloyatida kuzatilgan holatda esa o‘zini ichki ishlar idoralari xodimi deb tanishtirgan shaxs mahalliy fuqarodan uning tanishiga nisbatan IIO tomonidan Jinoyat Kodeksining 273-moddasi 5-qismi bilan qo‘zg‘atilgan jinoyat ishi yuzasidan mazkur shaxsni tergov hibsxonasidan chiqarish va unga nisbatan yuritilgan jinoyat ishini harakatdan tugatishni hal qilib berish evaziga 10 ming dollar talab qilgan.
Davlat xavfsizlik xizmatining Buxoro viloyati bo‘yicha boshqarmasi xodimlari tomonidan viloyat Iqtisodiy jinoyatlarga qarshi kurashish departamenti bilan hamkorlikda o‘tkazilgan tezkor tadbirda mazkur shaxs oldindan pullarning 2 ming dollarini olgan vaqtida ushlangan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!