Erkin kurash sport turi bo‘yicha 74 kg vazn toifasida Tokio-2020 Olimpiadasida bronza medalini qo‘lga kiritgan o‘zbekistonlik Bekzod Abdurahmonov MMA sportiga qaytmoqda. Bu haqda MMAJunkie nashri xabar bermoqda.

Qayd etish mumkin, Abdurahmonov 2012-2017-yillar oralig‘ida aralash jang san’atlari bilan shug‘ullangan va mazkur sport turida yettita jang o‘tkazib, ularning barchasida g‘alaba qozongan, oltitasida muddatidan avval g‘oliblikni qo‘lga kiritgan. Uning MMA bo‘yicha faoliyati Jahon chempionatlari, Osiyo o‘yinlari va Osiyo chempionatlarida xalqaro maydonda medallar qo‘lga kiritgan paytga to‘g‘ri keldi.

Abdurahmonovning uzoq tanaffusdan keyingi ilk jangi joriy yil 17-iyun kuni Amerika Qo‘shma Shtatlarining Massachusets shtatida tashkil etilayotgan Combat FC 4 turniri doirasida bo‘lib o‘tadi. Unga braziliyalik Derik de Freytas (7-5) raqiblik qiladi. Jang yarim o‘rta vazn toifasida (77 kg) o‘tkaziladi. De Freytas faqat mintaqaviy janglarda ishtirok etgan va 16 iyun kuni bo‘lib o‘tadigan bahs uning Qo‘shma Shtatlardagi debyuti bo‘ladi.

Eslatib o‘tamiz, Bekzod Abdurahmonov erkish kurash bo‘yicha jahon chempionati ikki karra bronza medali sohibi, ikki karra Osiyo chempioni hamda ikki karra Osiyo o‘yinlari g‘olibidir. Hamyurtimiz ayni damda AQSHdagi Harvard universitetida ham faoliyat yuritadi.

• Kurash
• MMA