Buyuk Britaniyada 2016-yilda bedarak yo‘qolgan Charli ismli mushuk 10 yil o‘tib o‘z uyiga qaytdi. Bu haqda BBC xabar berdi.

Charli 2016-yil aprel oyida g‘oyib bo‘lgan. Uning egalari Lyusi va Xanna Robertsonlar mushukni uzoq vaqt davomida izlagan, atrofdagilardan surishtirgan va ijtimoiy tarmoqlarda e’lonlar joylashtirgan. Biroq undan hech qanday darak topilmagan.

2026-yil 29-iyul kuni Xannaga Aberkarn shahridagi veterinariya klinikasidan qo‘ng‘iroq qilishgan. Ma’lum bo‘lishicha, yaqin atrofda yashovchi bir kishi Charlini butalar orasida ko‘rib, uni qarovsiz deb o‘ylagan va bir necha hafta davomida ovqatlantirib kelgan.

Keyinchalik u mushukni veterinarga olib borgan. Veterinar Charlidagi mikrochip orqali uning egalarini aniqlab, Xanna bilan bog‘langan.

Charlining egalaridan biri Lyusining aytishicha, mushukning tashqi ko‘rinishi deyarli o‘zgarmagan va u xuddi 10 yil avvalgi suratlaridagidek ko‘rinishda.

Hozirda Charli yangi sharoitga va oiladagi boshqa uy hayvonlariga qayta moslashmoqda.

10 yil davom etgan ayriliqdan so‘ng Charlining oilasiga qaytishi uning egalari uchun kutilmagan va quvonchli voqea bo‘ldi.