O‘zbekistonning bir qator hududlarida elektr energiyasidan noqonuniy foydalanish bilan bog‘liq yirik qoidabuzarliklar aniqlandi.

Bosh prokuratura huzuridagi Departament ma’lumotiga ko‘ra, tergovga qadar tekshiruvlar davomida tadbirkorlik subyektlari va fuqarolarning elektr tarmoqlariga o‘zboshimchalik bilan ulanib, elektr energiyasidan noqonuniy foydalangani aniqlangan.

Jumladan:

— Sirdaryo tumanida “S.U.” fermer xo‘jaligi mas’ullari suv nasoslarini elektr tarmog‘iga to‘g‘ridan-to‘g‘ri ulab, 1,1 mlrd so‘mlik zarar yetkazgan;

— Jizzax viloyati Sharof Rashidov tumanida “F.Z.B.” MCHJ suv nasoslarining noqonuniy ulanishi oqibatida 1,561 mlrd so‘mlik zarar yetkazilgan;

— Namangan shahrining Davlatobod tumanida “S.G.” MCHJ tomonidan 558,6 mln so‘mlik;

— Toshkent shahri Olmazor tumanida “G.B.” MCHJ mas’ullari tomonidan 272,6 mln so‘mlik elektr energiyasi noqonuniy ishlatilgani aniqlangan.

Shuningdek, Farg‘ona viloyati O‘zbekiston tumanidagi fermer xo‘jaligida 217,8 mln so‘mlik, Uchqo‘rg‘on tumanidagi baliqchilik xo‘jaligida 112 mln so‘mlik, Qoraqalpog‘iston Respublikasi Xo‘jayli tumanidagi g‘isht ishlab chiqarish zavodida 103,6 mln so‘mlik hamda Namangan shahrida fuqaro tomonidan 100,1 mln so‘mlik elektr energiyasidan noqonuniy foydalanilgani ma’lum bo‘lgan.

Aniqlangan holatlar natijasida elektr ta’minoti korxonalariga yetkazilgan umumiy zarar salkam 4 mlrd so‘mni tashkil etgan.

Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilgan. Hozirda tergov harakatlari olib borilmoqda.