Iordaniya, BAA, Indoneziya, Pokiston, Turkiya, Saudiya Arabistoni, Qatar va Misr tashqi ishlar vazirlari qo‘shma bayonot bilan chiqib, Isroilni G‘azodagi tinchlik jarayoniga to‘sqinlik qilishda aybladi.

Bayonotda Isroil Bosh vaziri Binyamin Netanyaxuning AQSH prezidenti Donald Trampning G‘azo bo‘yicha yo‘l xaritasini rad etishi hamda Falastin davlatchiligini inkor qilishi qoralangan.

Sakkiz davlat TIV rahbarlari bunday pozitsiya G‘azodagi mojaroni hal qilishga qaratilgan rejani amalga oshirishga jiddiy xavf tug‘dirishi va barqaror tinchlikka erishish bo‘yicha xalqaro sa’y-harakatlarga putur yetkazishini ta’kidlagan.

Ularning qayd etishicha, yo‘l xaritasi Misr, Qatar, Turkiya, AQSH, G‘azo bo‘yicha Oliy vakil va Tinchlik kengashi ishtirokidagi muzokaralar hamda Falastin fraksiyalari tomonidan qabul qilingan kelishuvlar natijasidir.

Rejada Isroil qo‘shinlarini G‘azodan olib chiqish, Xalqaro barqarorlashtirish kuchlarini joylashtirish, boshqaruv vakolatlarini G‘azoni boshqarish bo‘yicha Milliy qo‘mitaga topshirish, hududni qayta tiklash va qurolsizlantirish jarayonini amalga oshirish ko‘zda tutilgan.

Bayonotda AQSHning ushbu jarayonda faol ishtirokini davom ettirishi muhim ekani qayd etilib, Isroil reja va kelishuvlarni amalga oshirishga to‘sqinlik qilishi oqibatlari uchun javobgar bo‘lishi ta’kidlangan.

Avvalroq Binyamin Netanyaxu HAMAS to‘liq qurolsizlantirilmaguncha Isroil qo‘shinlari G‘azodan olib chiqilmasligini bildirgan edi.