O‘zbekistonda avtobus, trolleybus va tramvaylarda yo‘lkira to‘lamay yurgan yo‘lovchilarga nisbatan jarimalarni oshirish taklif qilinmoqda.

Transport vazirligi ma’lumotiga ko‘ra, tegishli takliflar ishlab chiqilib, Qonunchilik palatasiga kiritilgan.

Taklifga ko‘ra, yo‘lkirani birinchi marta to‘lamagan yo‘lovchiga BHMning 0,5 baravari miqdorida, ya’ni 2026-yil 1-sentyabrdan 220 ming so‘m jarima solinishi mumkin. Huquqbuzarlik takroran sodir etilsa, jarima BHMning 1 baravarigacha, ya’ni 440 ming so‘mgacha oshirilishi nazarda tutilmoqda.

Ayni paytda amaldagi tartib bo‘yicha jamoat transportida chiptasiz yurish uchun BHMning 0,1 baravari — 41 200 so‘m miqdorida jarima belgilangan.

Toshkent shahar yo‘lovchi tashishni monitoring va nazorat qilish davlat muassasasi direktori Muhammadjon Qahhorovning ma’lum qilishicha, 2026-yilning dastlabki yetti oyida 82 mingdan ortiq yo‘lovchining yo‘lkira to‘lamagani aniqlangan. Huquqbuzarlardan 2 milliard so‘mdan ortiq jarima undirilgan.

Shuningdek, 2026-yil 1-sentyabrdan yo‘lovchilarning avtobusga bevosita chiqish vaqtida yo‘lkira to‘lashi bo‘yicha yangi tartib joriy etilishi belgilangan. Yo‘lkirani to‘lamagan yo‘lovchilar chiptasiz yurgan deb hisoblanadi va ularga nisbatan ma’muriy jarima qo‘llanadi.