28-avgust kuni Prezident Shavkat Mirziyoyev ishtirokida O‘zbekiston mustaqilligining 35 yilligiga bag‘ishlangan tantanali tadbir bo‘lib o‘tadi. Bu haqda Prezident matbuot kotibi Sherzod Asadov ma’lum qildi.

Uning qayd etishicha, davlat rahbari bugun Toshkent shahridagi “Shahidlar xotirasi” xiyobonida qatag‘on qurbonlarini yod etish marosimida ishtirok etadi. Shuningdek, “Yangi O‘zbekiston” bog‘ida Mustaqillik monumenti poyiga gul qo‘yadi.

Kechqurun esa Shavkat Mirziyoyev mamlakat mustaqilligining 35 yilligiga bag‘ishlangan tantanali tadbirda ishtirok etib, o‘zbek xalqini bayram bilan tabriklaydi.

Eslatib o‘tamiz, avvalroq Prezident ishtirokida Mustaqillikning 35 yilligi munosabati bilan yuksak davlat mukofotlariga sazovor bo‘lgan bir guruh o‘zbekistonliklarni taqdirlash marosimi bo‘lib o‘tgandi.