Qozog‘istonning Turkiston viloyatida O‘zbekiston va Qozog‘istonni bog‘lovchi “Toshkent — Termiz” xalqaro avtomobil yo‘lining 24,1 kilometrlik qismi rekonstruksiya qilinib, foydalanishga topshirildi. Bu haqda “24KZ” xabar berdi.

Yangilangan M-39 avtomagistrali Maqtaaral tumani hududidan o‘tadi. Rekonstruksiya doirasida yo‘l birinchi toifali, to‘rt qatorli avtomobil yo‘liga aylantirildi. Ta’mirlash ishlari 2024-yil sentyabr oyida boshlangan bo‘lib, loyihaning umumiy qiymati 3 milliard tengeni tashkil etdi.

Dastlab yo‘lning shikastlangan beton konstruksiyalari ta’mirlandi. Shundan so‘ng 400 ming kvadrat metr maydonga asfalt yotqizildi. Yo‘l bo‘yidagi to‘siqlar yangisiga almashtirildi, shuningdek, oltita ko‘prikdagi asfalt qoplamasi ham yangilandi.

M-39 avtomagistrali Qozog‘iston va O‘zbekiston o‘rtasidagi chegaraoldi qatnovlari uchun muhim transport yo‘nalishlaridan biri hisoblanadi. Ushbu yo‘l orqali yuk va yo‘lovchi tashish amalga oshiriladi. Uning yaqinida “Selinniy” hamda O‘zbekiston tomonidagi “Oq oltin” chegara nazorat-o‘tkazish punkti, shuningdek, “Sirdaryo” nazorat-o‘tkazish punkti joylashgan.

Maqtaaral tumani hokimi o‘rinbosari Serik Tursinqulovning ta’kidlashicha, yangilangan transport koridori chegara punktlarining o‘tkazish qobiliyatini oshirish va hududning tranzit salohiyatini kengaytirishga xizmat qiladi.

Ma’lumotlarga ko‘ra, ushbu avtomagistral orqali har kuni 15 mingtagacha avtomobil harakatlanadi. Yangilangan yo‘l yuk tashish hajmini oshirish va Qozog‘iston hamda O‘zbekiston o‘rtasidagi xalqaro savdo aloqalarini rivojlantirishga xizmat qilishi kutilmoqda.