Ijtimoiy tarmoqlarda kichik yoshdagi qiz onasi tomonidan kaltaklangani to‘g‘risida xabarlar tarqalgan edi.

Ushbu holat yuzasidan Bolalar ombudsmani matbuot xizmati izoh berdi.

Bolalar ombudsmani so‘roviga ko‘ra, Ichki ishlar organlari tomonidan aniqlanishicha, joriy yilning 23-dekabr kuni Toshkent viloyati Bo‘stonliq tuman tibbiyot birlashmasiga voyaga yetmagan Y.M. (2020-yilda tug‘ilgan qiz) tanasidagi turli jarohatlar bilan qabul qilingan.

Holat yuzasidan o‘tkazilgan tergovga qadar tekshiruv natijasida E.Y. (1977-yilda tug‘ilgan ayol) 4 yoshli qizini qattiq kaltaklab, tan jarohati yetkazganligi aniqlangan.

Xususan, tibbiyot xulosasiga ko‘ra, bolada bosh miya yopiq jarohati, bosh miya lat yeyishi og‘ir darajasi va bosh sohasidagi boshqa og‘ir jarohatlar qayd etilgan.

Kecha, 2024-yil 27-dekabr kuni holat yuzasidan Toshkent viloyati Chirchiq shahar IIB  tomonidan E.Y.ga nisbatan  JKning 126-1-moddasi 7-qismi “b” bandi (oilaviy maishiy zo‘ravonlik) bilan jinoyat ishi qo‘zg‘atilgan.

Xabarda shuningdek, holat yuzasidan dastlabki tergov harakatlari olib borilayotganligi va qo‘shimcha ma’lumot berilishi aytilgan.

Ma’lumot uchun, endilikda JKning 126-1-moddasi (oilaviy maishiy zo‘ravonlik) jinoyati bo‘yicha jabrlanuvchilar doirasiga bolalar ham kiradi.

• Bola
• Chirchiq
• Jinoyat
• Kaltaklash