“Vuds-Xoul” Okeanografiya instituti Atlantika okeanida cho‘kib ketgan “Titanik” laynerining ilgari e’lon qilinmagan kadrlari aks etgan videoni e’lon qildi. Ushbu video Jeyms Kemeronning shu nomdagi filmi suratga olinganining 25 yilligiga to‘g‘ri keldi.

Kadrlar 1986-yil iyul oyida Okeanografiya instituti tadqiqotchilari tomonidan olingan. Ular Alvin boshqariladigan suv osti kemasi va masofadan boshqariladigan Jeyson Junior modulining kameralaridan foydalangan.

Videoda kema qoplamasining ko‘plab elementlarini va uning yuqori palubasi, shuningdek, dekor va ichki bezatishning ba’zi elementlarini ko‘rish mumkin. Tasvirning sifati ancha past, ammo suratga olish yili va shart-sharoitlarni hisobga olish kerak – “Titanik”ning vayronalari 3750 metr chuqurlikda joylashgan.

Layner 1912-yil 14apreldan 15-aprelga o‘tar kechasi Sautgempton portidan Nyu-York shahriga ilk sayohatida aysberg bilan to‘qnashib ketganidan so‘ng cho‘kib ketgan. Ushbu baxtsiz hodisa 1496 kishining hayotiga zomin bo‘lgan. “Titanik”ning qoldiqlari 1985-yil sentyabrga qadar topilmagan.

Avvalroq, olimlar 110 yil avval cho‘kib ketgan “Titanik”dan yuqori sifatli noyob kadrlarni suratga olishga muvaffaq bo‘lgan edi.

Qayd etish mumkin, “Titanik” 1997-yilda rejissyor Jeyms Kemeron tomonidan suratga olingan, afsonaviy Titanik laynerining cho‘kishi tasvirlangan amerika filmi. Turli ijtimoiy qatlamlar vakillari bo‘lgan film qahramonlari 1912-yilda Atlantika okeani bo‘ylab birinchi va oxirgi sayohatini amalga oshirgan layner bortida bir-birlarini sevib qolishadi. Bosh rollarni Leonardo Di Kaprio va Keyt Uinslet ijro etgan.

Loyiha byudjeti 200 million AQSH dollarini tashkil etgan va bu o‘z davri uchun rekord summadir. “Titanik” 1 milliard dollarlik marrani bosib o‘tgan birinchi, 2 milliard dollarlik marrani bosib o‘tgan ikkinchi film hisoblanadi. U dunyo bo‘ylab 2,2 milliard dollardan ortiq daromad keltirgan.

“Titanik” filmi umumiy hisobda 87 ta mukofotga munosib deb topilgan. Ularning 11 tasi nufuzli "Oskar" mukofoti hisoblanadi.

• Titanik
• gollivud