Oliy Majlis Qonunchilik palatasi deputati va “Milliy tiklanish” DP Markaziy kengashi raisi Alisher Qodirov ijtimoiy tarmoqdagi sahifasi orqali Davron Kabulovning konsert uchun taklifiga javob qaytardi.

Qayd etilishicha, “Million” jamoasi sardori uni may oyida bo‘lib o‘tadigan yangi konsert dasturiga taklif qilgan. Qodirov esa bu uchun vaqt ajratishini ma’lum qilgan. 

“Davron Kabulov, taklif uchun rahmat. May uchun, albatta, rejalashtiraman. Nima uchun “Million”ni tomosha qilish kerak? Xalq va hokimiyat o‘rtasidagi muloqot doim ham ochiq va samimiy bo‘lavermaydi. Buni tan olish kerak. Azaldan bu kelishmovchilikni hal qilishda hazil-mutoyibaning ahamiyatli o‘rni bo‘lgan va hozir ham shunday. Odamlarning yuzingizga aytavermaydigan tanqid va tanbehlarini hazil orqali bilib olishda foyda ko‘p”, – deya yozgan Alisher Qodirov.

Deputatning ta’kidlashicha, u “Million”chilarni mushtarak maqsadlar uchun partiya safiga taklif qiladi: 

“Jamiyatni o‘zgartirish har birimizning o‘zgarishlarimizdan boshlanadi. Milliy tiklanishimiz sizlarning ishtirokingizda yanda jadalroq bo‘lishiga ishonaman. “Million” bu million ekaniga shubha yo‘q. Faqat birmi yoki o‘ttiz beshmi? Qancha ko‘p bo‘lsak va O‘zbekiston uchun birlashtira olsak shuncha tezroq o‘zgaramiz va rivojlanamiz”.

Avvalroq, jamoa a’zolari “Million”ning konsert dasturi orqali Alisher Qodirovning migrantlarga soliq joriy qilish taklifini sahnaga olib chiqqan edi. 

Qayd etish mumkin, yanvar oyida Qodirov Tarbiya va ta’lim vazirligi tashkil etish taklifini bildirib, vazirning uchta – oila va xotin-qizlar masalalariga, bog‘chada tarbiya va boshlang‘ich ta’limni tashkil etishga hamda maktabda ta’lim-tarbiyani tashkil qilishga mas’ul bo‘lgan o‘rinbosarlari bo‘lishi kerakligini aytib o‘tgan edi.

• Alisher Qodirov
• Deputat
• million