Italiya yo‘llarida agressiv haydovchilarga duch kelish ehtimoli eng yuqori ekani ma’lum bo‘ldi. Bu haqda Euronews nashrida e’lon qilingan yangi global tadqiqot natijalarida qayd etilgan.

Tadqiqotga ko‘ra, sayyohlar orasida mashhur bo‘lgan ayrim mamlakatlar avtomobil boshqarish uchun nisbatan xavfli hududlar sifatida qayd etilgan. Haydovchilarning keskin manevrlari, yo‘lni to‘sib qo‘yish, xavfli yaqinlashish, haqoratli imo-ishoralar va yo‘lda yuzaga keladigan janjallar bunga asosiy sabablar sifatida ko‘rsatilgan.

So‘rovnoma natijalariga ko‘ra, Italiya birinchi o‘rinni egallagan. Respondentlarning 23 foizi ushbu mamlakatda rulda kutilmagan yoki mas’uliyatsiz xatti-harakatlarga duch kelganini bildirgan.

Buyuk Britaniya 11 foiz bilan ikkinchi, AQSH esa 9 foiz bilan uchinchi o‘rinni egallagan. Keyingi o‘rinlardan Fransiya va Avstraliya 5 foizdan, Ispaniya va Turkiya esa 4 foizdan natija qayd etgan.

Tadqiqotda yo‘llardagi agressiv xatti-harakatlarning asosiy sabablaridan biri sifatida transport oqimining yuqoriligi va tirbandliklar ko‘rsatilgan. Mutaxassislarning ta’kidlashicha, haydovchilar stress holatida yoki kechikayotgan paytda yo‘l harakati qoidalarini buzishga va boshqa haydovchilarga nisbatan agressiv munosabatda bo‘lishga ko‘proq moyil bo‘ladi.

Respondentlar yo‘llardagi agressiyaning keng tarqalgan ko‘rinishlari sifatida haqoratli imo-ishoralar, signalni ortiqcha ishlatish, avtomobil oynasidan baqirish hamda oldinda harakatlanayotgan mashinaga xavfli darajada yaqinlashishni qayd etgan.

Ekspertlar xorijda avtomobil boshqarayotgan sayyohlarni mahalliy yo‘l harakati qoidalariga amal qilishga, ehtiyotkor bo‘lishga va yo‘llarda yuzaga keladigan mojarolarga aralashmaslikka chaqirmoqda.