AQSH Prezidenti Donald Tramp joriy yilning iyul oyida Turkiya poytaxti Anqarada o‘tkazilgan NATO sammitidan so‘ng mamlakatni yashirin tarzda tark etgan. Bu haqda The Washington Post xabar berdi.

Ma’lumotlarga ko‘ra, Tramp 7–8 iyul kunlari Anqarada bo‘lib o‘tgan NATO davlatlari rahbarlari sammitida ishtirok etgan. U Anqaraga Qatar qirollik oilasi tomonidan sovg‘a qilingan yangi prezidentlik samolyotida kelgan.

Biroq Tramp Turkiyadan qaytishda ommaga o‘zining eski prezidentlik samolyotida uchib ketayotgandek ko‘ringan. Jurnalistlar ham dastlab prezident aynan shu bortda AQSHga qaytadi, deb hisoblagan.

The Washington Post manbalariga ko‘ra, aslida esa Tramp aeroportda yashirincha AQSH Harbiy-havo kuchlarining C-32A rusumli kichikroq harbiy-transport samolyotiga o‘tkazilgan. Prezidentni samolyotgacha kichik yuk mashinasida olib borishgan. Bu transport vositasi odatda samolyotlarga oziq-ovqat va boshqa zarur yuklarni yetkazish uchun ishlatiladi.

Xabarlarga ko‘ra, bunday maxsus operatsiya Trampga qarshi ehtimoliy hujumchilarning uning qaysi samolyotda ekanini aniqlashiga yo‘l qo‘ymaslik maqsadida amalga oshirilgan. AQSH rasmiylari bu chorani Eron tomonidan Trampga nisbatan mavjud bo‘lgan suiqasd tahdidi bilan bog‘lagan.

Oq uyning kommunikatsiyalar bo‘yicha direktori Stiven Chun nashrga bergan izohida xabarning tafsilotlarini tasdiqlamagan. Biroq u AQSH prezidentiga qarshi mavjud tahdidlarni jiddiy qabul qilishlarini va xavfsizlikni ta’minlash uchun barcha imkoniyatlardan foydalanishlarini bildirgan.

Avvalroq xalqaro OAV Isroil AQSH ma’muriyatiga Eron Trampga suiqasd uyushtirishning yangi rejasini tayyorlayotgani haqida razvedka ma’lumotlari taqdim etgani haqida xabar bergan edi.

Eslatib o‘tamiz, Tramp 2024-yil 13-iyul kuni Pensilvaniya shtatining Batler shahridagi saylovoldi mitingida qurolli hujumga uchragan va o‘ng qulog‘idan yaralangan. Shuningdek, 2024-yil sentyabr oyida uning Florida shtatidagi golf klubida qurollangan shaxs tomonidan uyushtirilishi mumkin bo‘lgan hujumning oldi olingan.