Toshkent shahrining Yakkasaroy va Chilonzor tumanlarida o‘tkazilgan tezkor-qidiruv tadbirlari davomida Telegram orqali narkotik moddalar savdosi bilan shug‘ullanganlikda gumonlangan ikki shaxs qo‘lga olindi.

Ichki ishlar vazirligi Tezkor-qidiruv departamenti hamda uning hududiy bo‘linmalari hamkorligida 3-avgust kuni o‘tkazilgan tadbirlar davomida 1993-yilda tug‘ilgan shaxs va 1992-yilda tug‘ilgan, avval Jinoyat kodeksining 228-moddasi 1- va 2-qismlari hamda 168-moddasi bilan sudlangan shaxs Yakkasaroy tumanida “zakladka” usulida gashish tarqatayotgan vaqtida ushlangan.

Tezkor xodimlar tomonidan ularning “Nexia-3” rusumli avtomobili ko‘zdan kechirilganda, 20 gramm gashish yog‘i aniqlanib, belgilangan tartibda hujjatlashtirib olingan.

Dastlabki ma’lumotlarga ko‘ra, gumonlanuvchilar 2025-yildan buyon Telegram platformasidagi narkodo‘konda “omborchi” sifatida faoliyat yuritib, oyiga qariyb 10 kilogrammgacha turli xil giyohvandlik vositalarini tarqatib kelgan.

Tezkor tadbirlar ularning yashash manzillarida ham davom ettirilgan. Tintuv va ko‘zdan kechirish ishlari natijasida u yerdan 2 kilogramm gashish yog‘i, marixuana va gashish, shuningdek, giyohvandlik vositalarini qadoqlash va tarqatishda foydalanilgan izolyatsion lentalar hamda boshqa ashyolar aniqlangan.

Mutasaddi tashkilotlar ma’lumotiga ko‘ra, tadbir davomida jami 2 kilogramm 170 gramm, ya’ni taxminan 10 700 dozaga teng giyohvandlik vositalari noqonuniy muomaladan chiqarilgan.

Mazkur holat yuzasidan gumonlanuvchilarga nisbatan O‘zbekiston Respublikasi Jinoyat kodeksining 273-moddasi 6-qismi bilan jinoyat ishi qo‘zg‘atilgan.

Ichki ishlar organlari fuqarolarni giyohvandlik vositalarining noqonuniy tarqalishiga oid shubhali holatlar haqida xabar berishga chaqirdi. Bunday ma’lumotlarni “Stopnarko_bot” Telegram boti yoki ishonch telefonlari orqali yuborish mumkin.