O‘zbekistonda 18 yoshdan katta aholining 64 foizi ortiqcha vaznga ega. Bu ko‘rsatkich Markaziy Osiyo va MDH davlatlari orasidagi eng yuqori natijalardan biri hisoblanadi.

“Our World in Data” Jahon sog‘liqni saqlash tashkiloti ma’lumotlari asosida keltirgan statistikaga ko‘ra, 1980-yilda O‘zbekistonda kattalarning 28 foizi ortiqcha vaznli bo‘lgan. Hozir esa bu ko‘rsatkich 64 foizga yetgan.

Markaziy Osiyodagi boshqa davlatlarda ortiqcha vaznli kattalar ulushi:

 Turkmaniston — 58% Tojikiston — 58%

 Qozog‘iston — 56%

 Qirg‘iziston — 56%

MDH davlatlaridan Rossiyada bu ko‘rsatkich 56%, Belarusda esa 55%ni tashkil etadi.

O‘zbekistonda 18–64 yoshdagi aholining qariyb 20 foizi klinik semizlik mezonlariga javob beradi.

Mutaxassislar ortiqcha vazn va semizlik yurak-qon tomir kasalliklari, yuqori qon bosimi hamda 2-toifa qandli diabet xavfini oshirishini ta’kidlamoqda.

Bundan tashqari, O‘zbekistonda bir kishiga to‘g‘ri keladigan o‘rtacha kunlik tuz iste’moli 14,9 grammni tashkil etadi. Bu JSST tavsiya qilgan 5 gramm miqdordan qariyb 3 barobar ko‘p.

Aholining taxminan uchdan bir qismi yetarli miqdorda meva va sabzavot iste’mol qilmaydi. Shuningdek, aholining 46 foizida xolesterin miqdori yuqori ekani qayd etilgan.

Dunyo bo‘yicha esa aholining qariyb 45 foizi ortiqcha vaznga ega. AQSHda bu ko‘rsatkich 71%, BAAda 70%, Buyuk Britaniyada 62%, Yaponiyada esa 24%ni tashkil etadi.