Surxondaryoning Angor tumanida xizmat vazifasini bajarayotgan ikki nafar YPX xodimiga fuqarolar tomonidan tan jarohati yetkazildi. Holat yuzasidan jinoyat ishi qo‘zg‘atildi.

Ma’lum qilinishicha, 9-avgust kuni 39 yoshli fuqaro Damas avtomobilini boshqarib kelib, YPX xodimlarini ko‘rgach, harakat yo‘nalishini o‘zgartirib, qochishga uringan.

Xodimlar avtomobilni kuzatib borib, haydovchini to‘xtatgan. Undan spirtli ichimlik hidi kelgani sababli tibbiy ko‘rikdan o‘tkazish uchun olib ketmoqchi bo‘lgan paytda uning qarindoshlari va qo‘shnisi voqea joyiga yetib kelgan.

Ular xizmat vazifasini bajarayotgan IIO xodimlariga faol qarshilik ko‘rsatib, ikki nafar xodimga tan jarohati yetkazgan.

Holat yuzasidan Angor tumani prokuraturasi va IIB xodimlari tomonidan o‘rganish ishlari olib borilib, fuqarolarga nisbatan Jinoyat kodeksining 219-moddasi 2-qismi bilan jinoyat ishi qo‘zg‘atilgan.