Davlat kadastrlari palatasining Farg‘ona viloyati tumanlaridan biridagi filiali rahbari, 1990-yilda tug‘ilgan fuqaro, noqonuniy qurilgan savdo do‘koniga nisbatan Kadastr agentligining tuman bo‘limi tomonidan tuzilgan dalolatnomani bekor qildirish hamda qonuniy chora ko‘rilmasligini ta’minlash evaziga joriy yilning iyul oyi boshlarida 600 AQSH dollari olgan.

Biroq mansabdor shaxs va’dasini bajarmay, fuqaro bergan pulning 500 AQSH dollarini qaytarib bergan.

Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan olib borilgan tezkor-qidiruv tadbirlari natijasida mazkur noqonuniy holat fosh etilgan.

Holat yuzasidan Kadastrlar palatasi filiali rahbariga nisbatan jinoyat ishi qo‘zg‘atilgan.

Hozirda dastlabki tergov harakatlari olib borilmoqda.

Hurmatli fuqarolar! Kundalik hayotingizda shu kabi qonunbuzilish holatlariga duch kelsangiz, DXXning 1520 qisqa raqamiga qo‘ng‘iroq qilib, xabar berishingiz mumkin. Shaxsingizning sir saqlanishi kafolatlanadi.