O‘quv yili boshlanishi arafasida Toshkent shahriga turli hududlardan kelayotgan talabalar va ularning yaqinlarini internetdagi soxta ijara e’lonlari orqali aldash holatlari ko‘paymoqda.

Toshkent shahar IIBB ma’lumotlariga ko‘ra, firibgarlar o‘zlariga tegishli bo‘lmagan xonadonlarning suratlarini internetga joylashtirib, ularni arzon narxda ijaraga berishni taklif qilmoqda.

Talabalar yoki ularning ota-onalari e’lon bo‘yicha murojaat qilganida esa firibgarlar uyni “band qilib qo‘yish” yoki ikki oylik ijara haqini oldindan to‘lashni talab qiladi. Pul o‘tkazilgach, ular aloqani uzib, ijtimoiy tarmoqlarda bloklab qo‘yadi.

Natijada fuqaro na uyga ega bo‘ladi, na to‘lagan pulini qaytarib oladi.

IIBB fuqarolarni ogohlikka chaqirdi:

Uyni ko‘rmasdan turib, hech qachon oldindan pul to‘lamang.

Ijara shartnomasini faqat xonadonni shaxsan ko‘rib, uning egasi bilan uchrashganingizdan so‘ng tuzing.

Ishonch hosil qilmaguningizcha pasport ma’lumotlari va boshqa shaxsiy ma’lumotlaringizni begona shaxslarga yubormang.

Talabalar turar joyiga ariza topshirish

Talabalar turar joylari uchun arizalar 1-avgustdan boshlangan. Arizalarni my.gov.uz portali orqali yuborish mumkin.

Avvalo imtiyoz va ustuvorlikka ega talabalar yotoqxonalarga qabul qilinadi. Shundan so‘ng qolgan o‘rinlar umumiy ro‘yxatdagi talabalar o‘rtasida navbat asosida taqsimlanadi:

▪️ 1-kurs talabalari — 55–65 foiz;

▪️ 2-kurs talabalari — 15–20 foiz;

▪️ 3-kurs va undan yuqori kurs talabalari — 20–25 foizgacha.

Arizalar qabuli o‘quv yili yakunigacha davom etadi.

Arzon ijara takliflariga aldanib qolmang — avvalo xonadon va uning egasini tekshiring!