Joriy yilning 8-avgust kuni ijtimoiy tarmoqlarda Majburiy ijro byurosi xodimlari fuqaroning uy-joyini ogohlantirishsiz buzishga uringani haqida xabarlar tarqaldi.

Mazkur holat Majburiy ijro byurosining Surxondaryo viloyati boshqarmasi tomonidan o‘rganildi.

O‘rganishlar davomida ma’lum bo‘lishicha, ushbu holat Denov tumanlararo fuqarolik ishlari bo‘yicha sudining 2025-yil 29-dekabrdagi ijro hujjati asosida amalga oshirilgan.

Sud hujjatiga ko‘ra, Denov tumani G‘alaba massivi, “Chuqurqishloq” mahallasi hududida qishloq xo‘jaligiga mo‘ljallangan sug‘oriladigan yer maydonining 0,20 gektar qismi o‘zboshimchalik bilan egallangan. Ushbu hududda qurilgan uy-joy va boshqa noqonuniy qurilmalarni buzish hamda yer maydonini asl holatiga keltirish belgilangan.

Mazkur ijro hujjati 2026-yil 24-yanvar kuni Majburiy ijro byurosining Denov tuman bo‘limi ish yurituviga kelib tushgan va ijro ishi qo‘zg‘atilgan. Qarzdorlar sud hujjati talablarini bajarish zarurligi haqida belgilangan tartibda ogohlantirilgan.

Shuningdek, sud ajrimiga asosan ijro harakatlari muayyan muddatga to‘xtatib turilgan. Keyinchalik sud ko‘rsatmasiga muvofiq mazkur to‘xtatish bekor qilinib, ijro harakatlari davom ettirilgan.

Qarzdorlar tomonidan sud hujjati talablari ixtiyoriy ravishda bajarilmagani sababli 2026-yil 7-avgust kuni majburiy ijro harakatlari belgilangan. Bu haqda tegishli tashkilotlar ham xabardor qilingan.

Natijada sud hujjatida ko‘rsatilgan noqonuniy qurilmalar belgilangan tartibda buzilib, yer maydonini asl holatiga keltirish bo‘yicha sud hujjati ijrosi to‘liq ta’minlangan.

Shu munosabat bilan ijtimoiy tarmoqlarda tarqalgan “fuqaroning uy-joyi ogohlantirishsiz buzilmoqchi bo‘lingan” mazmunidagi xabarlar haqiqatga to‘g‘ri kelmasligi ma’lum qilinadi.