AQShning sobiq prezidenti Jo Baydenda aniqlangan prostata saratoni tanasining boshqa qismlariga, jumladan suyaklariga ham tarqalgan. Kasallik unga kuchli og‘riq va holsizlik keltirmoqda. Bu haqda uning o‘g‘li Xanter Bayden BBC telekanaliga bergan intervyusida ma’lum qildi.

Xanter Bayden otasining sog‘lig‘i haqida gapirar ekan, uning ahvolini kuzatish oila uchun juda og‘ir kechayotganini ta’kidladi. Uning so‘zlariga ko‘ra, saraton metastazlari suyaklar va boshqa a’zolarga ham tarqalgan.

83 yoshli Jo Bayden AQSH tarixidagi eng keksa prezident hisoblanadi. Uning yoshi prezidentlik davrida sog‘lig‘i bilan bog‘liq xavotirlarni kuchaytirgan. Bayden 2025-yil may oyida, Oq uyni tark etganidan to‘rt oy o‘tmay, saraton kasalligiga chalinganini ma’lum qilgan edi.

Xanter Baydenning aytishicha, otasining kasalligi butun oila uchun og‘ir sinov bo‘lgan. Shunga qaramay, Jo Bayden jamoatchilik oldida o‘zi muhim deb hisoblagan masalalar yuzasidan fikr bildirishda davom etmoqda.

Intervyu davomida Xanter Bayden otasi tomonidan unga berilgan afv haqida ham gapirdi. U ushbu qaror uchun otasidan minnatdor ekanini aytib, shu bilan birga, afv qarorini tanqid qilish uchun asoslar borligini ham tan oldi.

Eslatib o‘tamiz, Jo Bayden 2025-yilda saraton hujayralarini olib tashlash maqsadida jarrohlik amaliyotini boshdan kechirgan edi.