Davlat xavfsizlik xizmatining Sirdaryo viloyati bo‘yicha boshqarmasi xodimlari tomonidan boshqa mutasaddi idoralar bilan hamkorlikda o‘tkazilgan tekshiruv davomida Boyovut tumanidagi masʼuliyati cheklangan jamiyat binosida noqonuniy mayning ferma faoliyat yuritayotganligi maʼlum bo‘ldi.

Aniqlanishicha, Toshkent shahrida ro‘yxatdan o‘tgan xorijiy korxona ushbu MChJ binosini 2 yil muddatga ijaraga olgan va u yerda 1 491 komplekt mayning qurilmalari hamda 9 280 dona videokartalardan foydalangan holda mayning ferma tashkil etgan.

Natijada 2020-yilning avgust oyidan buyon 7,7 mln. AQSh dollariga teng kriptovalyuta ishlab chiqarilgan.

Buning uchun masʼuliyati cheklangan jamiyat va xorijiy korxona rahbarlari o‘zaro til biriktirib, elektr tarmog‘iga ulanish uchun tuman elektr tarmoqlari korxonasi bilan tuzilgan shartnomada faoliyat turiga quyonchilik fermasi tashkil etish mazmunida soxta maʼlumotlar kiritishgan. 

Foydalanilgan katta hajmdagi elektr energiyasi uchun past narxda to‘lovni amalga oshirishlari natijasida, ular tomonidan davlat manfaatlariga juda ko‘p miqdorda zarar yetkazilgan.

Hozirda mazkur holat yuzasidan jinoyat ishi qo‘zg‘atilgan.

Maʼlumot uchun, ayni vaqtda O‘zbekistonda ushbu yo‘nalishni tartibga solishga qaratilgan qator normativ-huquqiy hujjatlar qabul qilingan va ularga asosan kripto-aktivlar aylanmasi sohasidagi faoliyat litsenziyalanishi belgilab qo‘yilgan.

• DXX
• Jinoyat
• Kriptovalyuta
• Mayning
• Sirdaryo