31°
Kechasi 18°
Prezident Shavkat Mirziyoyev va bir qator amaldorlar O‘zbekistonning birinchi mudofaa vaziri, iste’fodagi general-polkovnik Rustam Ahmedov vafoti munosabati bilan hamdardlik bildirdi.
O‘zbekiston Qurolli Kuchlarining taniqli namoyandasi, mamlakatning birinchi mudofaa vaziri, iste’fodagi general-polkovnik Rustam Ahmedov 12-oktyabr kuni 82 yoshida vafot etgan edi. Prezident matbuot xizmati tomonidan e’lon qilingan hamdardlikda ta’kidlanishicha, butun hayotini harbiy sohaga bag‘ishlagan Rustam Ahmedov tank polkida vzvod komandiri, tank diviziyasi siyosiy bo‘limi boshlig‘ining yordamchisi, tank diviziyasi batalyoni komandirining siyosiy ishlar bo‘yicha o‘rinbosari, Toshkent oliy tank qo‘mondonlik bilim yurti kursantlar bataloni komandirining o‘rinbosari lavozimlarida xizmat qilgan. Toshkent oliy tank qo‘mondonlik, Samarqand oliy harbiy avtomobil qo‘mondonlik va Toshkent oliy umumqo‘shin qo‘mondonlik bilim yurtlarida rahbarlik lavozimlarida ishlagan.
O‘zbekiston mustaqillikka erishganidan so‘ng Rustam Ahmedov mudofaa vaziri, birmuncha muddat Milliy gvardiya qo‘mondoni vazifasini bajaruvchi sifatida faol ish olib borib, milliy armiyani shakllantirish, davlat mudofaa tizimini barpo etish, harbiy kadrlarni tayyorlash yo‘lida jonbozlik ko‘rsatadi. Mudofaa vazirligining Bosh shtabi qayta tashkil etilib, Qurolli Kuchlar Birlashgan shtabiga aylantirildi, harbiy okruglar tuzildi, harbiy qismlarning joylashuv va boshqaruv tizimi takomillashtirildi. Mudofaa vazirligining boshqa kuch tuzilmalari bilan hamkorligini mustahkamlash bo‘yicha keng ko‘lamli ishlar amalga oshirildi.
U 1997–1998-yillarda O‘zbekiston favqulodda vaziyatlar vaziri lavozimida ham samarali faoliyat olib borgan.
Faxriy general, ulug‘ yoshda bo‘lishiga qaramasdan, Yangi O‘zbekistonda Qurolli Kuchlarni modernizatsiya qilish, harbiy xizmatchilarning jangovar va ma’naviy tayyorgarligini oshirish borasidagi ulkan islohotlarni amalga oshirishda mudofaa vazirining maslahatchisi sifatida o‘zining boy bilim va tajribasi bilan faol ishtirok etdi.
“Taniqli harbiy qo‘mondon, samimiy va kamtarin inson Rustam Ahmedovning xotirasi qalblarimizda hamisha saqlanib qoladi”, – deyiladi hamdardlikda.
Rustam Ahmedovning harbiy sohadagi xizmatlari davlat tomonidan taqdirlangan. U O‘zbekiston Respublikasining II darajali “Shon-sharaf” va “Do‘stlik” ordenlari bilan mukofotlangan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
