G‘arbiy Afrika Iqtisodiy Hamjamiyati (ECOWAS) delegatsiyasi Niger poytaxtiga yetib keldi. Bu haqda “Frans Press” agentligi mintaqaviy ittifoq va hokimiyatdan chetlatilgan prezident Muhammad Bazumga yaqin manbalarga tayanib xabar bermoqda.

Avvalroq ECOWASning siyosiy masalalar, tinchlik va xavfsizlik bo‘yicha komissari Abdel Fatau Musah 19-avgust kuni ECOWAS Nigerga diplomatik vakolatxonasini yuborishi mumkinligini aytgan edi.

Komissarning so‘zlariga ko‘ra, jamoa mojaroni tinch yo‘l bilan hal qilishga tayyor, biroq “tango birgalikda raqsga tushadi”. [Komissar tomonidan ishlatilgan ushbu ibora qars ikki qo‘ldan chiqadi degan ma’noni anglatadi].

“G‘arbiy Afrika davlatlaridan delegatsiya shanba kuni Niameyga yana diplomatik vositachi sifatida harakat qilish maqsadida yetib keldi”, – deyiladi agentlik xabarida.

Iyul oyi oxirida Niger harbiylari milliy televideniye orqali prezident Muhammad Bazum hokimiyatdan chetlatilganini e'lon qildi. Aksariyat G‘arb yetakchilari va G‘arbiy Afrika Iqtisodiy Jamiyati (ECOWAS) mintaqaviy tashkiloti davlat to‘ntarishini qoraladi.

• ECOWAS
• Niger