Samarqandda bo‘lib o‘tgan YUNESKO konferensiyasida misrlik olim va sobiq vazir Xolid Ahmad Al-Anani 179 ovozdan 172 tasini qo‘lga kiritib, to‘rt yillik muddatga bosh direktor etib saylandi. U 15-noyabr kuni amaldagi rahbar Odri Azulening o‘rnini egallaydi.

54 yoshli Al-Anani YUNESKO tarixida arab mamlakatidan saylangan ilk bosh direktor va Afrika qit’asidan bu lavozimni egallagan ikkinchi shaxs bo‘ldi. Undan avval bu lavozimni senegallik Amadu Maxtar M’Bou 1974–1987-yillarda bajargan edi.

Xolid Al-Anani Misrning Helvan universitetida misrshunoslik professori bo‘lib, bu sohada 30-yildan ziyod faoliyat yuritgan. U universitetda turizm va mehmonxona boshqaruvi fakultetida dekan o‘rinbosari, Ochiq ta’lim markazi direktori va kafedra mudiri lavozimlarida ishlagan. Olim Fransiyaning Monpele shahridagi Pol Valeri universitetida falsafa doktori darajasini olgan. U shu yerda bir necha bor mehmon professor sifatida ham dars bergan.

2014–2016-yillarda Misr sivilizatsiyasi milliy muzeyini, 2015–2016-yillarda Qohiradagi Misr muzeyini boshqargan. Keyinchalik u 2016–2022-yillarda Misrning qadimiy yodgorliklar va turizm ishlari bo‘yicha vaziri sifatida faoliyat ko‘rsatgan. 2024-yilda esa Jahon sayyohlik tashkiloti tomonidan madaniy turizm bo‘yicha maxsus elchi sifatida tayinlangan.

Ma’lumot uchun, YUNESKO Bosh konferensiyasining 43-sessiyasi 13-noyabrgacha davom etadi.

• Konferensiya
• Samarqand
• YUNESKO
• direktor
• saylov