Respublika bo‘ylab belgilanmagan joylarga chiqindi tashlanishining oldini olish maqsadida 200 ga yaqin zamonaviy videokameralar o‘rnatildi. Ushbu videokameralarning “Vaziyatlar markazi”da doimiy nazorati yo‘lga qo‘yilgan. Bu haqda AOKAda o‘tkazilgan brifingda Ekologiya, atrof-muhitni muhofaza qilish va iqlim o‘zgarishi vazirligi axborot xizmati rahbari Lola Rahmonboyeva ma’lum qildi.

Qayd etilishicha, kelgusida ekologiya sohasida xizmatlarni sifatli olib borish maqsadida “Vaziyatlar markazi” faoliyati to‘liq yo‘lga qo‘yiladi.

Shuningdek, yagona geoaxbarot ma’lumotlar bazasini yuritish, respublikadagi ekologik vaziyatni baholash va prognoz qilish uchun yagona monitoring tizimi ishga tushirilishi ham belgilangan.

Vazirlikning mavjud yo‘nalishlarini raqamlashtirishda esa jami 8 ta axborot tizimi joriy etiladi.

Kelgusida elektron hukumatni rivojlantirish maqsadida Vazirlik tomonidan ko‘rsatiladigan davlat xizmatlari aholi uchun soddalashtiriladi.

Qolaversa, tizimda mehnat qilayotgan 1000 nafardan ziyod xodimning IT sohasidagi bilim va malakalari oshiriladi. 20 nafar xodim xalqaro ta’lim platformalari orqali o‘qitiladi.

• Brifing
• Ekologiya