Farg‘ona viloyatiga jamoat transporti uchun Xitoydan 24 ta zamonaviy avtobus olib kelindi. Bu haqda Farg‘ona viloyati hokimligi matbuot xizmati xabar berdi.

Yangi avtobuslar Farg‘ona shahrida ikkita yangi yo‘nalishda qatnay boshlaydi va har kuni o‘rtacha 10 ming nafar yo‘lovchiga xizmat ko‘rsatish quvvatiga ega.

Shavkat Mirziyoyevning 2023-yil 16-fevraldagi “Jamoat transporti tizimini isloh qilish chora-tadbirlari to‘g‘risida”gi qarori asosida viloyatda salmoqli ishlar amalga oshirilmoqda. Yil yakuniga qadar Farg‘ona shahridagi avtobuslar sonini 104 taga yetkazish rejalashtirilgan.

Bundan tashqari, viloyatda jamoat transportini yanada rivojlantirish maqsadida 2025-yil aprel oyida viloyat transport boshqarmasi va 9 ta tashuvchi korxona rahbarlarining Xitoyga xizmat safari amalga oshirildi. Safar davomida “Zong Tong” va “Asia Star” kabi mashhur ishlab chiqaruvchilar bilan 384 ta avtobus va mikroavtobus xarid qilish bo‘yicha memorandum imzolandi. Loyihaning umumiy qiymati 19,5 mln dollarni tashkil etadi.

• Avtobus
• Farg‘ona
• O‘zbekiston