Birlashgan Millatlar Tashkiloti G‘azo sektorida bolalar o‘rtasida to‘yib ovqatlanmaslik darajasi xavfli bosqichga yetganidan ogohlantirdi. Ma’lumotlarga ko‘ra, 2025-yil davomida qariyb 95 ming bola ushbu muammo bilan yuzma-yuz kelgan. Qattiq qish sharoiti gumanitar yordam tufayli erishilgan qisqa muddatli ijobiy natijalarni deyarli yo‘qqa chiqarmoqda.

BMT matbuot kotibi Stefan Dyujarrik 12-yanvar kuni bo‘lib o‘tgan matbuot anjumanida Gumanitar masalalarni muvofiqlashtirish boshqarmasi (OCHA) ma’lumotlariga tayanib, G‘azodagi gumanitar vaziyat hanuz og‘irligicha qolayotganini ta’kidladi. Uning so‘zlariga ko‘ra, noqulay ob-havo sharoiti gumanitar yordam yetkazib berish jarayonini jiddiy murakkablashtirmoqda.

“Faqat dekabr oyining o‘zida 76 mingdan ortiq bola tibbiy ko‘rikdan o‘tkazildi va 4 900 ta o‘tkir to‘yib ovqatlanmaslik holati aniqlangan. Shulardan 820 tasi og‘ir darajadagi to‘yib ovqatlanmaslik holatlaridir. Natijada, 2025-yilda qayd etilgan bunday holatlarning umumiy soni qariyb 95 mingga yetdi”, — dedi Dyujarrik.

BMT vakilining ma’lum qilishicha, hozirga qadar 28 mingga yaqin oilaga chodirlar, brezentlar va adyollar yetkazib berilgan. Shunga qaramay, G‘azo sektorida 1,1 million kishi hanuz zudlik bilan gumanitar yordamga muhtoj. Kuchli yomg‘irlar esa mavjud vaqtinchalik boshpanalarga jiddiy zarar yetkazishda davom etmoqda.

• BMT
• Bolalar
• G‘azo
• Ochlik
• oziq-ovqat