“24-noyabrdan keyin ortga chekinishi kutilgan havo ifloslanishini kuchaytiruvchi inversiya jarayoni kelgusi hafta oxirigacha saqlanib turadi”, deya xabar bermoqda “O‘zgidromet” agentligi.

Juma kuni agentlik direktori Sherzod Habibullayev so‘nggi kunlarda Toshkent va uning atrofidagi hududlarda havo ifloslanishining kuchayishiga bir vaqtning o‘zida bir qancha tabiiy omillar, xususan, harorat inversiyasi, yog‘ingarchilikning yo‘qligi va qurg‘oqchilik sabab bo‘lganini hamda inversiya 24-noyabrgacha davom etishi mumkinligi haqida gapirgandi.

Yangilangan prognozlarga ko‘ra, havo qatlamlarining aralashishiga to‘sqinlik qilayotgan ob-havo sharoiti kelayotgan haftaning oxirigacha saqlanib turishi mumkin. Bu davrda havo sifati nobarqaror bo‘lishi tabiiy hol bo‘lib, ko‘rsatkichlar kun davomida o‘zgarib turadi.

“Havo sifatining yaxshilanishi havo massalarining almashishi, shamolning kuchayishi yoki yog‘ingarchilik tushishi bilan bog‘liq bo‘ladi”, deyiladi bayonotda.

“Kuzatilayotgan holat — tabiiy, vaqtinchalik va mavsumiy jarayon. Vakolatli davlat organlari vaziyatni doimiy kuzatib bormoqda va zarurat tug‘ilganda tezkor choralar ko‘rmoqda”, — deydi agentlik.

“Ko‘rsatkichlarning oshishiga harorat o‘zgarishi ham sabab bo‘lgan. Haroratning keskin o‘zgarishi inversiya jarayonini keltirib chiqaradi, bu esa mayda zarrachalarning to‘planishiga va atmosfera havosidagi konsentratsiyasining oshishiga olib keladi”, — deyiladi xabarda.

“O‘zgidromet” respublika aholisi hamda mehmonlaridan ehtiyot choralarini ko‘rishlarini so‘rab, ochiq havodagi faoliyatlarini qisqartirishlari, tashqariga chiqqanda niqob taqishlarini tavsiya etgan.

• Ob-havo
• O‘zgidromet