“Real Madrid” klubi mulkchilik tuzilmasini o‘zgartirish bo‘yicha muzokaralar olib bormoqda. Voz Populi’ning xabar berishicha, Sixth Street investitsiya kompaniyasi va LVMH rahbari Bernard Arno klub ulushini xarid qilishga qiziqish bildirgan.

Manbaga ko‘ra, investorlar “Real”ning taxminan 10 foiz aksiyasi uchun 1 mlrd yevro atrofidagi taklifni tayyorlamoqda. Florentino Peres xorijiy sarmoya jalb qilish rejalarini faollashtirgani aytilmoqda. Klubning ayni damdagi umumiy bahosi 10 mlrd yevrodan yuqori ekani qayd etilgan.

Dekabr o‘rtalarida klub a’zolari qatnashadigan navbatdan tashqari yig‘ilish o‘tkazilishi rejalashtirilgan. Unda iqtisodiy huquqlarga ega, lekin boshqaruvda ishtirok etmaydigan minoritar aksiyadorlarni joriy etish masalasi muhokama qilinadi.

Sixth Street hozirda “Santiago Bernabeu”dagi tijorat loyihalarida sherik hisoblanadi. LVMH esa yaqinda klubning rasmiy ta’minlovchisiga aylangan. Ulush sotib olish har ikki tomon uchun ham uzoq muddatli, xavfi past strategik qadam sifatida baholanmoqda.

Loyiha ma’qullansa, “Real” boshqaruv va sport markazlashuvini saqlagan holda, rivojlanish uchun qo‘shimcha moliyaviy resurslarga ega bo‘ladi.

• Ispaniya
• Real