Hindistonning Karnataka shtatida metapnevmovirus (HMPV) bilan kasallangan ikki holat aniqlangan. Bu haqda, Hindustan Times xabar bermoqda.

Mamlakat Sog‘liqni saqlash vazirligi bayonotiga ko‘ra, har ikki holat ham bronxopnevmoniya bilan bog‘liq. Shifoxonaga yotqizilgan ikki nafar chaqaloqda metapnevmovirus aniqlangan. Anamnezida bronxopnevmoniya bo‘lgan uch oylik qizcha davolanishdan so‘ng sog‘aygan, sakkiz oylik o‘g‘il bola esa hali ham davolanayotgani aytilmoqda.

Bemorlarning birortasi ham mamlakatdan tashqariga chiqmagan. Hindiston Sog‘liqni saqlash vazirligi virus mamlakatda faol tarqalayotganini ta’kidlagan.

Qirg‘izistonda metapnevmovirusning ikki holati, Qozog‘istonda esa 30 ta holat aniqlangan. Xitoyda metapnevmovirusga chalinish keskin ko‘paymoqda. Ushbu kasallik allaqachon O‘zbekistonda ham qayd etilgan. Sanepidqo‘mitaga ko‘ra, ushbu respirator infeksiyalarning so‘nggi laboratoriya tahlillari natijasiga ko‘ra: 36,9 foizida gripp virusi, 30,2 foizida rinovirus, 28,6 foizida respirator-sinsitial virus, 1,2 foizida metapnevmovirus va 3,1 foizida boshqa viruslar aniqlangan.

• Chaqaloq
• Hindiston
• Virus