Sayyoramizning eng badavlat odami, milliarder Ilon Mask oʻziga tegishli boʻlgan oxirgi uyni 30 million AQSh dollari evaziga sotib yubordi. Endilikda uning nomida hech qanday koʻchmas mulk mavjud emas.

“Tesla” asoschisining nomidagi oxirgi uy 1912-yilda qurilgan, kattaligi 1,5 ming kvadrat metrni tashkil qiluvchi hashamatli qasr edi. U Silikon vodiysi hududida joylashgan. Ushbu qasr fransiyalik graf Kristian de Gine tomonidan qurilgan va graf oilasi uyga 100 yildan ortiq vaqt mobaynida egalik qilgan. Ilon Mask ushbu qasrni 2017-yilda 23,4 million dollar evaziga sotib olgandi.

Tadbirkor 2020-yilning may oyida oʻz nomidagi barcha koʻchmas mulklarni sotib yuborishni vaʼda qilgan. Shundan keyin u oʻziga qarashli boʻlgan toʻrtta uyni 60 million dollar evaziga pullagan.

Eslatib oʻtamiz, milliarder ayni vaqtda “SpaceX“ bazasiga yaqin hududda joylashgan Boka Chikadagi kichik uyda yashaydi. Uy tadbirkor tomonidan ”SpaceX” kompaniyasidan 50 ming AQSh dollari evaziga ijaraga olingan.

• mashhurlar
• milliarderlar
• qiziqarli