Ilon Mask anklavdagi xavf tufayli G‘azoga tashrif buyurishga hali tayyor emasligini aytdi.
Falastinning XAMAS radikal harakati amerikalik milliarder va SpaseX egasi Ilon Maskni G‘azo sektoriga tashrif buyurishga taklif qildi.

Bu haqda Bayrutdagi matbuot anjumanida harakat rahbariyati a’zosi Usama Hamdan ma’lum qildi, deb yozdi Al-Jazira nashri.

“Biz Ilon Maskni G‘azo sektoriga tashrif buyurishga chaqiramiz, toki u Isroilning G‘azo sektorida xalqimizga qarshi amalga oshirgan qirg‘in ko‘lamini ko‘rishi mumkin”, – degan u.

Bundan tashqari, XAMAS jahon ommaviy axborot vositalari jurnalistlarini Isroil armiyasi tomonidan sodir etilgan vayronagarchiliklar ko‘lami va genotsid belgilarini ko‘rish uchun G‘azo sektoridagi ishtirokini oshirishga chaqirgan.

Ilon Mask Isroilga 27-noyabr kuni tashrif buyurgan edi. O‘sha kungi suhbatda tadbirkor Ilon Mask Isroil bosh vaziri Binyamin Netanyaxuga G‘azo sektoridagi qayta tiklanishga tayyorligini ma’lum qilgan, deya xabar berdi RIA Novosti.

Maskning gapiga izoh berar ekan, Netanyaxu tinchlik o‘rnatish va G‘azo sektorini tiklash faqatgina XAMAS mag‘lub bo‘lgandan keyin mumkin bo‘lishini ta’kidlagan. Tadbirkor siyosatchining fikrini ma’qullagan va “qotilliklarni rejalashtirayotgan”larni zararsizlantirish zarurligini aytgan.

Bundan tashqari, Isroil bosh vaziri restavratsiya qilishda amerikalik tadbirkorning yordamiga umid qilishini alohida qayd etib o‘tgan. Mask bundan xursand bo‘lishini aytgan.

Avvalroq bosh vazir Ilon Maskga XAMAS a’zolari kirib kelgan chegaradagi Kibbutz Kfar Aza aholi punktiga tashrif buyurib, u yerda janubiy aholi punktlariga qilingan hujum oqibatlarini ko‘rsatganini ma’lum qilgandik.

• Falastin
• Ilon_Mask
• Isroil